Sùr Swinda: 'Kristu ta mi forsa'

Valdemar Marcha  

ISBN 9789088506390 | 64 Pagina's | Hardcover | Verschenen 2015

Omschrijving

Sùr Swinda Seraus a dediká su bida kompleto na sirbi Kristu i su próhimo. Na un edat hóben el a drenta konbentu i a bira religioso den e Kongregashon di ‘Zusters van Roosendaal’. Despues di su konsagrashon el a bolbe nos islanan i a sirbi komunidat den diferente funshon. Siendo un religioso el a traha entre otro na Hospital San Francisco i tambe Cas di Sosiegu kaminda su amor pa Dios i su pueblo a yud’é trese hopi sosten i alivio pa klientenan. Su inteligensia i forsa ta legendario i e mes ta konfirmá esaki:

“Tur kos mi por den Kristu ku ta duna mi forsa.”

Sur Swinda a heredá kas di su mayornan i a pone esaki bou di Mariadal pa asina kontribuí ainda mas na kuido di grandinan. E kas akí ta karga e nòmber ‘Ka’i Mimina’ komo homenahe pa i rekuerdo di su mama Wilhelmina (‘Mimina’) Seraus.

Sùr Swinda su pashon no tabata solamente di un índole religioso i sosial, pero el a lanta i krese semper ku un amor grandi i kontinuo pa agrikultura. Un prueba di esaki ta e kunuku ku gobièrnunan di tantu Boneiru komo Hulanda a yuda Sùr Swinda konstruí. Un lugá grandi i produktivo ku ta trese alimento material, emoshonal i spiritual pa tur esnan ku pasa algun tempu einan ku aktividatnan di plantashon, meditashon o orashon.

Pa su trabou ehemplar pa pueblo di Boneiru, Sùr Swinda a risibí kondekorashon di Kas Real Hulandes i rekonosementu di diferente organisashon sosial na Boneiru.