Wanana
€ 23,90

Wanana

Afrika prekolonial, un introdukshon

Prof.dr. Rose Mary Allen  

ISBN 9789085601753 | 160 Pagina's | Paperback | 1ste druk 2022

Omschrijving

Ku referensia spesial na Wanawa, e palabra den e idioma Gueni ku grandinan na Kòrsou tabata referí na dje ora ta trata di nan pais di orígen na Afrika.

-------------------------

Afrika ta e di dos kontinente mas grandi di mundu despues di Asia. Sin embargo, hopi hende tin e tendensia di mira Afrika komo un solo pais, i su hendenan komo un solo pueblo. E tendensia akí ta simplifiká historia i kultura di e kontinente i ta neglishá su diversidat natural, históriko, ekonómiko, kultural i sosial.

Hopi biaha ta asosiá historia di Afrika solamente ku e historia di sklabitut transatlántiko. Esaki ta basá riba e idea eróneo ku Afrika no tabatin historia promé ku yegada di europeonan. Historiografia tradishonal, salí for di punto di bista euroséntriko, ta presumí ku historia di Afrika a kuminsá ku e komèrsio di sklabitut transatlántiko, kaminda miónes di su habitantenan a keda transportá komo katibu pa e kontinente amerikano. Esnan ku pensamentu kontrali na e punto di bista euroséntriko, tambe a pinta Afrika hopi biaha solamente komo víktima di kolonialismo, i no komo agente di su propio historia i kultura riku. 

Estudionan ta mustra ku e kontinente akí no tabata isolá for di sobrá di mundu na momentu ku europeonan a yega den siglo 15. Pueblonan na e kontinente afrikano tabatin interkambio ku otro paisnan mediteráneo, europeo i asiátiko pa medio di e rutanan di komèrsio via tera i laman. For di siglo 7, nan tabatin kontakto ku pueblonan musulman, pues ku religion islam. Ta di Nortáfrika nan a move pa Europa i konkistá gran parti di Spaña.  Historia ta mustra ku pueblonan di Afrika tabatin kontakto profundo ku kulturanan di sur di Asia. Asta tin mas i mas evidensia ku Afrika tabatin kontakto ku Suramérika promé ku e europeonan a yega einan.

Meta prinsipal di e buki akí ta pa duna un bista di Afrika ku ta otro for di e persepshon eróneo ku sa tin di dje. E ta un introdukshon kòrtiku na papiamentu di historia i kultura di Afrika prekolonial. E periodo prekolonial ta e periodo promé ku dominashon polítiko europeo di Afrika. 

Historia i kultura afrikano prekolonial ta hopi diversifiká i kompliká. E historiadó amerikano Molefi Kete Asante ta bisa, “ku no por skirbi e historia di Afrika, pero un historia di Afrika”. Pa e motibu ei e buki akí tampoko no ta pretendé di kontene e historia kompleto di Afrika. E buki ke lanta interes pa kultura i historia di Afrika, pa asina hende mes sigui buska mas informashon i disfrutá di e historia riku i diversifiká di e kontinente akí.